ముంబై ఇండియన్స్‌ అభిమానుల అంచనాలను అందుకోలేకపోయాం.. ముందు అది అంగీకరించాలి: పొలార్డ్‌

ఐపీఎల్‌లో ఐదుసార్లు ఛాంపియన్‌గా నిలిచిన ముంబై ఇండియన్స్‌ ఇటీవలి సీజన్లలో అభిమానుల అంచనాలకు తగ్గట్టుగా ఆడలేకపోయిందని ఆ జట్టు కొత్త హెడ్‌ కోచ్‌ కీరన్‌ పొలార్డ్‌ అంగీకరించాడు. తిరిగి పాత వైభవాన్ని సాధించాలంటే ముందుగా తమ లోపాలను గుర్తించి అంగీకరించాలని అన్నాడు. జట్టులో మళ్లీ పోరాట స్ఫూర్తిని నింపి, ప్రత్యర్థులు భయపడేలా ముంబైని తీర్చిదిద్దుతామని చెప్పాడు.

గత నాలుగు ఐపీఎల్‌ సీజన్లలో బ్యాటింగ్‌ కోచ్‌గా పనిచేసిన పొలార్డ్‌.. మహేల జయవర్ధనే స్థానంలో ప్రధాన కోచ్‌గా బాధ్యతలు చేపట్టాడు. 2010లో ఆటగాడిగా ముంబైతో అనుబంధం ప్రారంభించిన అతడు.. 2013, 2015, 2017, 2019, 2020లో ఐపీఎల్‌ టైటిళ్లు సాధించిన జట్లలో భాగమయ్యాడు.

“మనం అభిమానులు కోరుకున్నంత గొప్పగా ఆడలేకపోయామని అంగీకరించాలి. మెరుగుపడటానికి తొలి అడుగు అదే. అభిమానులు మాకు ఎప్పుడూ అండగా ఉన్నారు. కొత్త తరం క్రికెటర్లతో కలిసి మళ్లీ మధుర జ్ఞాపకాలు సృష్టించాలని కోరుకుంటున్నాం. ముంబై మరోసారి నిర్భయంగా ఆడే జట్టుగా మారాలి” అని పొలార్డ్‌ తెలిపాడు.

2020 తర్వాత ముంబై ఇండియన్స్‌ మరోసారి ఐపీఎల్‌ టైటిల్‌ గెలవలేదు. 2023, 2025లో ప్లేఆఫ్స్‌కు చేరినప్పటికీ.. 2024లో పదో స్థానం, 2026లో తొమ్మిదో స్థానంతో సరిపెట్టుకుంది. ఈ వైఫల్యాలను దాచిపెట్టబోమని పొలార్డ్‌ స్పష్టం చేశాడు.

“వాంఖడే స్టేడియంలో ముంబై నీలి జెండా ఎగరాలి. అభిమానుల ఉత్సాహం, జట్టు పట్ల అభిమానం ఆటగాళ్లలోనూ కనిపించాలి. మనం ఎవరి కోసం, దేనికోసం ఆడుతున్నామో అర్థం చేసుకోవాలి. వ్యక్తిగత ప్రయోజనాల కంటే జట్టుకే ప్రాధాన్యం ఇస్తాం. ప్రత్యర్థులు ముంబైతో ఆడిన అనుభవాన్ని గతంలోలా గుర్తుంచుకునేలా చేయాలి. ముందుకు వెళ్లాలంటే కొన్నిసార్లు గతాన్ని గుర్తుచేసుకుని మన గుర్తింపును అర్థం చేసుకోవాలి” అని వివరించాడు.

ప్రధాన కోచ్‌ బాధ్యతలు చేపట్టడం ఇంకా కొత్త అనుభూతిగానే ఉందన్న పొలార్డ్‌.. ఆటగాడిగా ఉన్నప్పటి గెలుపు కసి తగ్గదని చెప్పాడు. “ఎప్పుడూ గెలవాలనే తపన, జట్టులో ఉత్సాహాన్ని నింపాలనే పట్టుదల అలాగే ఉంటాయి. కాకపోతే ఇప్పుడు మైదానానికి కొంచెం దూరం నుంచి నా పాత్ర పోషించాలి” అని పేర్కొన్నాడు.

తనకు ముందు కోచ్‌గా పనిచేసిన మహేల జయవర్ధనే నుంచి ఎంతో నేర్చుకున్నానని పొలార్డ్‌ తెలిపాడు. ప్రత్యర్థిగా మొదలైన పరిచయం, అతడి శిక్షణలో ఆటగాడిగా, తర్వాత సహాయకుడిగా పనిచేసే వరకు కొనసాగిందని గుర్తుచేసుకున్నాడు. వ్యూహరచన, ప్రణాళిక, ఆటగాళ్ల నుంచి అత్యుత్తమ ప్రదర్శన రాబట్టడంలో జయవర్ధనే విధానం తనకు ఎంతో ఉపయోగపడిందని చెప్పాడు.